短暫的十號 遊走豪門的藝術家 – 班拿約

17

- Advertisement -

每隊球隊對十號都有象徵性意義,亦對穿著起既球員有一份肯定,而今次介紹既就係其中一位曾經為車路士穿著起十號波衫既球員 – 班拿約,如果你有留意開英超一段唔短既時間就一定會識佢,雖然佢喺史丹福橋效力既時間並唔長,不過佢算係藍軍由硬朗注入技術既第一位球員。

班拿約既球員生涯效力過唔少球會,而其中就由韋斯咸將以色列人帶到黎英超賽場,雖然身形瘦削,不過貴為「技術流」球員既班拿約足以為唔少英超後衛帶黎惡夢,左右腳運用都非常純熟,喺優秀既技術根底下盤球能力亦都相當出眾,加上亦能自己埋門,有速度同技術可能話過你就過你,你想撞佢佢又未必跌,就算佢跌左又可能博到犯規,而且班拿約亦能擔任左中右所有位置,基本上係一個好洗好用既進攻球員。

而加盟利物浦後再將班拿約既名氣進一步推高,除左喺英超之外亦能夠喺歐洲賽場上一展身手,開始令世界既球迷都認識到哩位以色列人,可惜既係始終都欠缺一個奬盃,最終選擇由紅轉藍轉投車路士,並穿上十號球衣。當年佢同費蘭度托利斯其實都係前後腳加盟,藍軍選擇收購班拿約既主因好大程度就係為左激活哩位「西班牙王子」,與此同時亦為林伯特同艾辛哩類形硬朗中場之中加添一點技術味道,剛柔並重,對於當時唔少車迷黎講的確幾有新鮮感。

可惜既係車路士亦繼班拿約後開始於歐洲球壇搜羅更多技術形星級球員,以色列人亦好快被馬達、奧斯卡等人取代其位,及後亦被外借到另一支列強球會阿仙奴當中,而喺槍手短短一季既球員生涯之中,班拿約既表現絕不失禮,當時更令唔少阿仙奴球迷希望領隊雲加買斷,但最終始終都未能成事,而班拿約之後再短暫回歸韋斯咸以及加盟QPR,就離開英超球壇淡出主流目光。

對於一名以色列球員黎講能夠先後效力過利物浦、車路士以及阿仙奴,可以話經已達成史無前例既創舉,而列強先後都搵佢返黎亦係對球員能力表示一份肯定,遊走豪門的藝術家 – 班拿約。

Leave a Reply

This site uses Akismet to reduce spam. Learn how your comment data is processed.

%d bloggers like this: